7 fevriye 1986 yon leson demokratik, 7 fevriye 2013 enpinite ap kontinye layite

Publié le 8 février 2013

Sitwayen ayisyen ki te konnen kisa rejim Duvalier a te fè nan peyi a, prensipalman viktim yo, pa deside bat ba. Apre l fin pase 25 lane deyò, Jean Claude Duvalier gen 2 lane depi l soti Lafrans epi rantre nan peyi a. Sa te siprann anpil moun, men te gen planifikasyon kanmèm pou ansyen diktatè a te vin chita nan peyi a kè poze malgre gwo mobilizasyon kont prezans li ann Ayiti. Leve kanpe pèp ayisyen an pou kapote rejim bout di ki te gen mak fabrik kò sasinay, disparisyon, ekzil, arestasyon, maspinay, te bay koulè yon lòt solèy ki t ap briye nan syèl peyi d Ayiti nan lane 1986.

27 lane apre

Reprezantan divès enstitisyon ak viktim leve kanpe pou di non ak enpinite, pou jistis blayi, men batay la sanble lwen pou jwenn rezilta y ap chache a. 7 fevriye 2013, Jean Claude Duvalier pa mete pwent pye nan tribinal, jan avoka l yo te anonse sa, yon fwa ankò lajistis ranvwaye afè a pou 21 fevriye k ap vini an. Pandan tout maten 7 fevriye a, militan k ap manifeste anfavè viktim yo ak sosyete a te plante pikèt yo devan baryè Pakè ki nan ansyen lokal USAID a sou Bisantnè. Revandikasyon ki te nan divès pankat yo te anpil. « Nou pa vle enpinite, arete epi jije Jean Claude Duvalier ak tout akolit li yo, dechoukay la pako fini gouvènman chaje makout, bandi legal nwa ak wouj tounen woz ak blan, Jean Claude Duvalier ak Meuz ap konplote pou vòlò tè laplèn/Duvivye » se kèk nan eslogan ki te make jounen an.

Nan baryè Pakè a, anpil pawòl piman bouk t ap boukante nan mitan patizan ansyen diktatè yo ak manifestan Kolektif yo. San okenn krentif, drapo nwa ak wouj ak eslogan « L’union fait la force », almanak ak foto ansyen diktatè a, mayo divalyeris te vin sipòte patwon yo. Nan boukante pawòl gen agresyon vèbal ki mennen lese frape nan foul la ki te melanje. Guy Numa yon militan MODEP ki te vin pote kole nan aktivite sa a te agrese kote yonn nan patizan Jean Claude Duvalier yo te menase dirijan MODEP la ak anpil kòlè. Yon menas kolektif la ta dwe pran oserye lè nou konsidere pwa Jean Claude Duvalier nan peyi a jounen jodi a. Sa montre, jodi a ankò nivo agresivite ak awogans moun k ap sipòte ansyen diktatè a anba je lajistis k ap fè laviwonn ak yon dosye ki nan men yo depi 2 lane.

Lajistis leve yon nasyon, enpinite a fè lawont li. Eske sosyete ayisyèn nan pa merite jwenn jistis pou tout krim ak vyolasyon rejim Duvalier a fè pandan 29 lane ? Se lajistis ayisyen ki pou ranmase karaktè l pou endepandans manman lwa peyi a ba li ka aplike. Antouka, Kolektif pou jije Duvalier a di y ap goumen jouk nan bout pou lajistis ka blayi.

Site conçu et réalisé par AtelierWeb du Groupe Medialternatif
© Tous droits reservés - Mars 2012

Enstitisyon patnè SAKS
REFRAKA, PAJ, ICKL, PAPDA, POHDH, ITECA, SOFA

Enstitisyon ki apiye SAKS
Broederlijk- DelenWacc, Développement et Paix, IMS, UNESCO, AJWS, Entraide et Fraternité

SAKS se  manm AMARC ak WACC.

Ang ri Richard Jules al riyèl Levasseur # 21 A- Delmas 75
Pòtoprens Ayiti W.I.- Bwat Postal 15639 - Petyonvil
Telefòn : (509) 2945-64 22 / 3170-6422 - Imèl: saks@saks-haiti.org