"Kolektif pou jije Duvalier" mobilize pou soutni plent yo nan tribinal jounen 7 fevriye 2013 la

Publié le 6 février 2013

Ansyen prezidan diktatè Jean Claude Duvalier pa p ka prezante devan jij jounen 7 fevriye 2013 la pou reponn kesyon sou krim li te fè nan moman l t ap dirije peyi a. Se avoka k ap defann ansyen diktatè a ki bay nouvèl la, akoz pwoblèm sekirite dapre sa yo di. Avoka yo fè konnen kapab gen konfwontasyon, konsa y ap evite fas a fas. Yon lòt kote, Kolektif pou jije Duvalye ki te pote plent kont diktatè a toujou kenbe randevou nan pakè pou akize a vini rann kont dapre deklarasyon Danielle Magloire ki se prezidant komite a, nan mikwo Rezo Nasyonal Edikasyon Radyofonik SAKS la. Militan feminis lan di mobilizasyon an kenbe. Konvokasyon sa a ap yon okazyon tou pou fè respekte dat 7 fevriye a konstitisyon 1986 la pale kòm yon dat istorik nan listwa peyi d Ayiti.

Kolektif pou jije Duvalier ki regwoupe divès viktim fanm tankou gason ap pare pou jounen 7 fevriye a pa pase konsa. Analiz divès sektè mete sou tapi siyale mannigèt yo di k ap fèt pou pase dat istorik Ayiti yo anba pye. Pou kenbe memwa lit pèp ayisyen an, konstitisyon 87 la kenbe dat 7 fevriye a kòm jou envestiti lè gen nouvo prezidan, men senbòl jou sa pote a pèdi sans chak jou pi plis akoz otorite nan peyi isit pa fè okenn jefò pou respekte l. Jounen 7 fevriye 2013 la viktim rejim bout di a twouve yo anfas diktatè Jean Claude ki tounen nan peyi a apre 25 lane pou jwi libète l anba enpinite.

N ap raple gouvènman Laurent Lamothe ap dirije ak prezidan Michel Martelly a bay ansyen diktatè a yon paspò diplomatik nan finisman lane 2012 la ki ba l dwa vwayaje menm jan ak ofisyèl nan pouvwa.

Site conçu et réalisé par AtelierWeb du Groupe Medialternatif
© Tous droits reservés - Mars 2012

Enstitisyon patnè SAKS
REFRAKA, PAJ, ICKL, PAPDA, POHDH, ITECA, SOFA

Enstitisyon ki apiye SAKS
Broederlijk- DelenWacc, Développement et Paix, IMS, UNESCO, AJWS, Entraide et Fraternité

SAKS se  manm AMARC ak WACC.

Ang ri Richard Jules al riyèl Levasseur # 21 A- Delmas 75
Pòtoprens Ayiti W.I.- Bwat Postal 15639 - Petyonvil
Telefòn : (509) 2945-64 22 / 3170-6422 - Imèl: saks@saks-haiti.org