Radyo Vwa Klodi Mizo retounen nan lè apre leve kanpe 28 novanm 2012 la

Publié le 5 décembre 2012

Mèkredi 28 novanm 2012 la, Sosyete Animasyon Kominikasyon Sosyal (SAKS), Asosyasyon Medya Kominotè yo (AMEKA), reprezantan radyo kominotè nan 10 depatman peyi a, Enstitisyon patnè ak divès lòt òganizasyon baz te plante pikèt devan biwo KONATEL ak ministè kominikasyon nan Pòtoprens. Objektif mobilizasyon sa a se pou denonse zak gwo ponyèt otorite yo fè sou estasyon radyo kominotè Vwa Klodi Mizo vandredi 9 novanm pase a nan vil Okay, sou pretèks li pa gen lisans. Se te okazyon tou pou denonse plan gouvènman genyen atravè KONATEL pou fèmen radyo kominotè yo nan peyi a.

Ak mesaj prensipal “radyo kominotè yo pa p fèmen” manifestan yo te gen nan men yo divès pankat ak yon latriye eslogan ki gen rapò ak dwa kominikasyon popilasyon an, libète lapwòl, lejitimite radyo kominotè yo, dwa popilasyon an genyen pou eksprime yo pa mwayen vwa yo chwazi, piga pou gouvènman ki vle mete baboukèt nan bouch pèp la elt…

Manifestan yo te montre angajman radyo kominotè yo kap bay yon sèvis piblik bò kote popilasyon ki pi lwen nan peyi a. VKM k ap emèt depi 1e me 1996, charye dèyè l yon lo revandikasyon Mouvman Inite Pèp Okay (MIPAK) ki se òganizasyon ki mete radyo a kanpe t ap travay sou yo. Dirijan VKM yo di menas ak mesaj te toujou rive jwenn yo pou anonse fèmti radyo a ki pa antre nan lojik chante lwanj pou gouvènman an. Se kòmkwa si yon medya pa p fè pwopagann li pa ta dwe ekziste. Si se nan lojik sa a gouvènman ap naje, li klè se sou wout diktati Ayiti ye.

Nan ki pwen negosyasyon yo ye apre sitin nan ?

Direktè SAKS la Sony Estéus, te akonpaye radyo VKM pou reponn envitasyon direktè Jean Marie Guillaume nan biwo l, pou diskite sou pwoblèm nan jedi 29 novanm 2012 la, yon jou apre sitin nan. Nan negosyasyon yo,

JPEG - 16.7 ko

direktèKONATEL la pwomèt pou radyo VKM relouvri epi pou lòt radyo kominotè yo kontinye travay annatandan tout sa k gen pou fèt yo regle. Samdi 1er desanm, 22 jou apre fèmti li, radyo Klodi Mizo retounen nan lè. SAKS te pwofite soumèt KONATEL yon lis radyo kominotè l ap akonpaye nan travay edikasyon popilè. N ap raple gen yon pwojè lwa ki depoze nan palman an depi lane 2008 k ap tann vòt palmantè yo, men anyen pako janm fèt. Biwo KONATEL li menm tou gen pwojè lwa sa a nan men l.

Kesyon k ap poze, èske se konsa yon peyi dwe mache, pou chak fwa sitwayen yo gen revandikasyon se beton pou yo pran pou jwenn solisyon ? Li pa nòmal pou se chalè beton ki pou fè otorite yon peyi tounen sou desizyon y ap pran ki pa anfavè popilasyon an.

Si jounen jodi a medya Leta yo ak kèk medya prive fè plis pwopagann pase edikasyon, radyo kominotè yo pa ka vin ajoute sou lis sa a pou kèlkeswa rezon. Ijans ki genyen nan kominote rekile yo nèg lavil rele “andeyò” a pa piti. Radyo kominotè yo pa p ka kite presyon sou okenn fòm detounen yo nan wout ledikasyon y ap travay nan tout kominote yo atravè 10 depatman peyi a.

Radyo kominotè yo se zouti edikasyon, sansibilizasyon ak konsyantizasyon ki pa dwe disparèt pou okenn rezon. Mobilizasyon an pa dwe kanpe nan wout. Popilasyon k ap soufri nan seksyon kominal yo se moun tankou tout moun.

Site conçu et réalisé par AtelierWeb du Groupe Medialternatif
© Tous droits reservés - Mars 2012

Enstitisyon patnè SAKS
REFRAKA, PAJ, ICKL, PAPDA, POHDH, ITECA, SOFA

Enstitisyon ki apiye SAKS
Broederlijk- DelenWacc, Développement et Paix, IMS, UNESCO, AJWS, Entraide et Fraternité

SAKS se  manm AMARC ak WACC.

Ang ri Richard Jules al riyèl Levasseur # 21 A- Delmas 75
Pòtoprens Ayiti W.I.- Bwat Postal 15639 - Petyonvil
Telefòn : (509) 2945-64 22 / 3170-6422 - Imèl: saks@saks-haiti.org