Tèt Kole ti Peyizan Ayisyen : yon kongrè pou yon nouvo depa

Publié le 4 décembre 2012

Tèt Kole Ti Peyizan Ayisyen ouvri 3e kongrè li lendi 3 desanm 2012 la nan Monwi. Se sou tèm : « 25 lane lit ak rezistans, peyizan ann gonfle fòs nou pou yon pouvwa popilè ». Aktivite yo te kòmanse dimanch swa ak yon seremoni kiltirèl kote manm Tèt Kole Ti Peyizan yo te onore memwa tout kanmarad yo ki tonbe nan batay la pandan 25 dènye lane yo.

Apeprè 400 delege ki soti nan 10 depatman peyi a ap patisipe nan 3e kongrè Tèt Kole Ti Peyizan Ayisyen yo pandan 3 jou pou fè bilan òganizasyon an sou plan politik, ekonomik, kiltirèl ak òganizasyonèl. Bilan sa a ap pèmèt manm yo gade fòs ak feblès òganizasyon an pandan 25 dènye lane yo epi defini estrateji batay yo pou lane k ap vini yo.

Kòdonatè kongrè a Mompoint Elie ki soti nan Federasyon Tèt Kole Plato Santral, retrase tout pwosesis ki mennen nan kongrè nasyonal la. Dapre M. Elie, Kongrè nasyonal la se aboutisman divès kongrè ki te kòmanse depi lane 2011 sou bitasyon pase nan seksyon kominal, komin ak depatman. Woumble nasyonal la se espas kote manm tout rejyon yo pral debat sa k te soti nan tout nivo kongrè yo pou yo rive nan yon sèl dizon.

JPEG - 11.5 ko

Bò kote pa l, Jean Henrilus Jacques, manm Komite Egzekitif Nasyonal Tèt Kole Ti Peyizan Ayisyen retrase listwa ak liy ideyolojik òganizasyon an. Listwa Tèt Kole Ti Peyizan Ayisyen te kòmanse nan kòmansman lane 1980 yo ak gwoupman Tèt Ansanm yo ki te jwenn ankadreman kèk pè pwogresis ak jèn entelektyèl ki te angaje nan batay pou chanjman sosyete a anfavè majorite popilasyon an ki se peyizan yo. Apre depa diktati a an 1986, gwoupman yo vin transfòme pou tounen yon mouvman nasyonal. Jodi a òganizasyon an prezan nan 50 komin nan peyi a ak plis pase 80 mil manm.

Konsènan liy ideyolojik Tèt Kole Ti Peyizan Ayisyen ap suiv, Mesye Jacques fè konnen se yon liy demokratik popilè. Oganizasyon an rekonèt tèt li nan gran mouvman sosyal ak popilè k ap batay pou yon transfòmasyon fondamantal nan chapant sosyete a.

Jounen lendi a te kòmanse ak yon analiz konjonkti, pwofesè Jean-Yves Blot te prezante reyalite kiltirèl la jounen jodi a ki domine ak relijyon k ap pouse kou djondjon nan peyi a espesyalman nan milye riral yo. Pou Mesye Blot, relijyon yo patisipe anpil nan demobilizasyon mouvman sosyal ak popilè yo.
Madam Alixe Pérard te pale sou konjonkti politik la, apre li te fin prezante sitiyasyon an kòm yon sitiyasyon malouk, li fè peyizan yo konnen sitiyasyon an kab chanje men fòk yo mete men nan batay la.

Mouvman peyizan entènasyonal Via Campesina ak brigad Mouvman Peyizan San Tè (MST) Brezil, Mouvman Nasyonal Peyizan Kongrè Papay (MPNKP), Kòdinasyon Rejyonal Oganizasyon Sidès (KROSE) prezan nan 3e kongrè nasyonal Tèt Kole Ti Peyizan Ayisyen an k ap fini mèkredi 5 desanm 2012 la.

Sony Esteus

SAKS

Site conçu et réalisé par AtelierWeb du Groupe Medialternatif
© Tous droits reservés - Mars 2012

Enstitisyon patnè SAKS
REFRAKA, PAJ, ICKL, PAPDA, POHDH, ITECA, SOFA

Enstitisyon ki apiye SAKS
Broederlijk- DelenWacc, Développement et Paix, IMS, UNESCO, AJWS, Entraide et Fraternité

SAKS se  manm AMARC ak WACC.

Ang ri Richard Jules al riyèl Levasseur # 21 A- Delmas 75
Pòtoprens Ayiti W.I.- Bwat Postal 15639 - Petyonvil
Telefòn : (509) 2945-64 22 / 3170-6422 - Imèl: saks@saks-haiti.org